Main Lafzoon Ki Bhikarin Hon Urdu Poet By Miss Dua Ali | Massom Pathai's Blog

میں لفظوں کی بھکارن ہوں

میں لفظوں کی بھکارن ہوں

مرے کاسے میں تو دو بول تو دے دے مرے سائیں

تو میرا شاہ لفظوں کا

مرے کاسے میں تو دو بول تو دے دے مرے سائیں

یہ تیرے بول ہیں  انمول کچھ تو سوچ اے سائیں

میں گم سم تیری سوچوں میں

خیالوں میں ترے کھوئی

میں بھٹکی راستہ، در پر ترے آئی

مجھے دَھن کی نہ چاہت ہے نہ دولت کی تمنا ہے

مجھے لفظوں کی چاہت ہے

مرے کاسے میں تو دو بول تو دے دے مرے سائیں

مرے سب خواب ٹوٹے ہیں

مرا دل ریزہ ریزہ ہے

مرے من میں ہے سناٹاچلی دل میں نہ پروائی

محبت کے عنایت کے ذرا سی اپنی چاہت کے

مرے کاسے میں تو دو بول تو دے دے مرے سائیں

مری آنکھوں میں ٹوٹے خواب کی ہیں کرچیاں بکھری

یہ کالی رات لمبی ہے بڑی لمبی ہے تنہائی

مرا اشکوں سے تر دامن

میں گم سم تیری سودائی

میں بھٹکی راستہ در پر ترے آئی

تو میرا شاہ لفظوں کا

مرے کاسے میں تو دو بول تو دے دے مرے سائیں

دعؔاعلی