Nend Ate Hy Magar Khawab Nhin Aty Hain Mjh Sy Milny Mry Ahbab Nhi Aty Hain Urdu Ghazal By Ramzi Asim

 نیند آتی ہے مگر خواب نہیں آتے ہیں

مجھ سے ملنے مرے احباب نہیں آتے ہیں

شہر کی بھیڑ سے خود کو تو بچا لاتا ہوں

گو سلامت مرے اعصاب نہیں آتے ہیں

تشنگی دشت کی دریا کو ڈبو دے نہ کہیں

اس لیے دشت میں سیلاب نہیں آتے ہیں

ڈوبتے وقت سمندر میں مرے ہاتھ لگے

وہ جواہر جو سر آب نہیں آتے ہیں

یا انہیں آتی نہیں بزم سخن آرائی

یا ہمیں بزم کے آداب نہیں آتے ہیں

ہم نشیں دیکھ مکافات عمل ہے دنیا

کام کچھ بھی یہاں اسباب نہیں آتے ہیں

رمزی آثم