Kia Hy Piyar Jisy Hum Ny Zindagi Ki Trah Wo Ashnah Bh Mila Hum Sy Ajnabi Ki Trah Urdu Ghazal By Qateel Shifai

 کیا ہے پیار جسے ہم نے زندگی کی طرح

وہ آشنا بھی ملا ہم سے اجنبی کی طرح

کسے خبر تھی بڑھے گی کچھ اور تاریکی

چھپے گا وہ کسی بدلی میں چاندنی کی طرح

بڑھا کے پیاس مری اس نے ہاتھ چھوڑ دیا

وہ کر رہا تھا مروت بھی دل لگی کی طرح

ستم تو یہ ہے کہ وہ بھی نہ بن سکا اپنا

قبول ہم نے کیے جس کے غم خوشی کی طرح

کبھی نہ سوچا تھا ہم نے قتیلؔ اس کے لیے

کرے گا ہم پہ ستم وہ بھی ہر کسی کی طرح

قتیل شفائی